ତିହିଡି,୧୫/୧୨(ଯଦୁମଣି ପାଣିଗ୍ରାହୀ): ତିହିଡି ଥାନାଧିକ ବୁଡଙ୍ଗ ହଳଧରବିନ୍ଧା ଗାଁର ପ୍ରାକ୍ତନ ପ୍ରଶାସନିକ ଅଧିକାରୀ(ଆଇଏଏସ୍) ବିଜୟ ନାୟକଙ୍କ ଘରୁ ଶନିବାର ରାତିରେ ଚୋରି ହୋଇଥିବା ଥାନାରେ ଅଭିଯୋଗ ହୋଇଛି । ପ୍ରକାଶ ଯେ, ଶ୍ରୀ ନାୟକ ନିଜ ପରିବାରର ଏକ ଶ୍ରାଦ୍ଧ ବାର୍ଷିକ ଉତ୍ସବରେ ଯୋଗ ଦେବାକୁ ୨/୩ ଦିନ ଲାଗି ଗାଁକୁ ଆସିଥିଲେ । ଏହି କାରଣରୁ ତାଙ୍କ ଘରେ ଭଡାରେ ରହୁଥିବା ବ୍ୟକ୍ତି ଜଣଙ୍କ ସେଠାରୁ ଚାଲି ଯାଇଥିଲେ । ଉତ୍ସବ ପରେ ଶନିବାର ମଧ୍ୟାହ୍ନରେ ଶ୍ରୀ ନାୟକ ଘରେ ତାଲା ଦେଇ ନିଜ କର୍ମକ୍ଷେତ୍ରକୁ ଫେରିି ଯାଇଥିଲେ । ରାତିରେ ଏହାର ସୁଯୋଗ ନେଇ ଚୋରମାନେ ତାଙ୍କ ଘରେ ପଶି ଟିଭି, ଇନଭେଟର, ସୁନା ଓ ନଗଦ ଟଙ୍କା ନେଇ ଯାଇଥିଲେ । ରବିବାର ସକାଳେ ଭଡାଟିଆ ଜଣଙ୍କ ଆସି ଦେଖନ୍ତି ତ ମୁଖ୍ୟ ଦ୍ୱାର ସମେତ ଝରକାର ଗ୍ରୀଲ ଭାଙ୍ଗି ଚୋରମାନେ ଭିତରକୁ ପଶିବା ସହ ଘରୁ ବିଭିନ୍ନ ସାମଗ୍ରୀ ନେଇ ଯାଇଛନ୍ତି । ଏଥିନେଇ ଶ୍ରୀ ନାୟକଙ୍କ ଜଣେ ସମ୍ପର୍କୀୟ ଦିବାକର ନାୟକ ଥାନାରେ ଅଭିଯୋଗ କରିବା ପରେ ପୋଲିସ ଘଟଣାସ୍ଥଳରେ ପହଞ୍ଚି ଖୋଳତାଡ ଆରମ୍ଭ କରିଛି । ପରେ ବାଲେଶ୍ୱରରୁ ସାଇଣ୍ଟଫିକ ଟିମ ଆସି ତଦନ୍ତ କରିଥିବା ପୋଲିସ ସୂତ୍ରରୁ ଜଣାଯାଇଛି ।
