ତିହିଡି, ୦୯/୧୧(ଯଦୁମଣି ପାଣିଗ୍ରାହୀ) : ତିହିଡି ଥାନାଧିନ ତାଳପଦା ଗାଁର ମଦ୍ୟପ ଯୁବକଙ୍କ ଆକ୍ରମଣରେ ଜଣେ ବ୍ୟକ୍ତି ଗୁରୁତର ଆହତ ହୋଇଥିବା ସୂଚନା ମିଳିଛି । ଗତକାଲି ଅପରାହ୍ନରେ ଶିବଶଙ୍କର ନାୟକ ନାମକ ଯୁବକ ପୂର୍ବ ଶତୃତାକୁ କେନ୍ଦ୍ରକରି ସେହି ଗାଁର ପ୍ରଦୀପ ମହାପାତ୍ରଙ୍କୁ ମରଣାନ୍ତକ ଆକ୍ରମଣ କରିଥିବା ଅଭିଯୋଗ ହୋଇଛି । ଗୁରୁତର ଅବସ୍ଥାରେ ପ୍ରଦୀପଙ୍କୁ ତିହିଡି ମେଡିକାଲରେ ଭର୍ତ୍ତିକରା ଯାଇଥିଲା । ତାଙ୍କର ଦୁଇ ହାତ, ପିଠି ଓ ଛାତିରେ ଗଭୀର କ୍ଷତ ସୃଷ୍ଟି ହୋଇଛିି । ଶିବଶଙ୍କର ନାୟକ ଜଣେ ଅଭ୍ୟାସଗତ ଅଭିଯୁ୍କ୍ତ ବୋଲି ଗ୍ରାମବାସୀଙ୍କ ପକ୍ଷରୁ କୁହାଯାଇଛି । ପୂର୍ବରୁ ବହୁବାର ଗାଁ ଲୋକଙ୍କୁ ଆକ୍ରମଣ କରିଥିବା ନେଇ ଥାନାରେ ଅଭିଯୋଗ ମଧ୍ୟ ହୋଇଛି । ପୋଲିସ କୌଣସି ପଦକ୍ଷେପ ନେଇ ନଥିବାରୁ ପ୍ରଦୀପଙ୍କୁ ଏପରି ଆକ୍ରମଣ କରିଥିବା ଅଭିଯୋଗ ହୋଇଛି । ଅଭିଯୁ୍କ୍ତଙ୍କ ଗିରଫ୍ ଦାବିକରି ସଂଧ୍ୟାରେ ପୋଲିସକୁ ଭେଟିଥିଲେ ଶତାଧିକ ପୁରୁଷ ଓ ମହିଳା । ଅଭିଯୁକ୍ତ ଜଣକ ଜଣେ ଆଇନ୍ଜୀବୀଙ୍କ ଗାଡି ଚଳାଉଥିବାରୁ କାହାରି ପ୍ରତି ଭୟ ନଥିବା ସେମାନେ ଅଭିଯୋଗ କରିଛନ୍ତି । ଅନ୍ୟପଟେ ପ୍ରଦୀପ ମହାପାତ୍ରଙ୍କ ଅଭିଯୋଗକୁ ଭିତ୍ତିକରି ପୋଲିସ ଏକ ମାମଲା ରୁଜୁ କରିଛି ଏବଂ ଖୁବ୍ ଶିଘ୍ର ତାକୁ ଗିରଫ୍ କରାଯିବ ବୋଲି ପୋଲିସ ସୂତ୍ରରୁ ସୂଚନା ମିଳିଛି ।
