ତିହିଡ଼ି,୦୪/୦୨(ଯଦୁମଣି ପାଣିଗ୍ରାହୀ): ତିହିଡି ବ୍ଲକ ଅଧିନ ପାଳିଆବିନ୍ଧାସ୍ଥିତ ବିରଞ୍ଚି ନାରାୟଣ ମାଧବ-ଅର୍ଜ୍ଜୁନ ମହାବିଦ୍ୟାଳୟର ଅର୍ଥନୀତି ବିଭାଗ ମୁଖ୍ୟ ପ୍ରାଧ୍ୟାପକ ଅନାମ ଚରଣ ସାହୁଙ୍କୁ ମହାବିଦ୍ୟାଳୟର ଅଧ୍ୟାପକ କର୍ମଚାରୀ ସଂଘ ପକ୍ଷରୁ ସମ୍ବର୍ଦ୍ଧନା ପ୍ରଦାନ କରାଯାଇଛି । ସଂଘର ସଭାପତି ପ୍ରାଧ୍ୟାପକ ପବିତ୍ର ପାଣିଗ୍ରାହୀଙ୍କ ପୌରୋହିତ୍ୟରେ ଅନୁଷ୍ଠିତ ଉତ୍ସବରେ କଲେଜର ଅଧ୍ୟକ୍ଷ ଡ.ଅଜିଜୁର ରହେମାନ, ପ୍ରାକ୍ତନ ଅଧ୍ୟକ୍ଷ କମଳାକାନ୍ତ ସ୍ୱାଇଁ ଓ କମଳାକାନ୍ତ ବିଶ୍ୱାଳ, ପ୍ରାକ୍ତନ ପ୍ରାଧ୍ୟାପକ ହୃଦାନନ୍ଦ ପାଣିଗ୍ରାହୀ, କୈଳାସଚନ୍ଦ୍ର ସାମଲ, ମନୋଜ କୁମାର ସ୍ୱାଇଁ, ପ୍ରାକ୍ତନ ପ୍ରାଧ୍ୟାପିକା ଅରୁନ୍ଧତୀ ସେନାପତି ଓ ପୁଷ୍ପମିତ୍ରା ପଣ୍ଡା ପ୍ରମୁଖ ଅତିଥି ଭାବେ ଯୋଗଦେଇ ପ୍ରାଧ୍ୟାପକ ଶ୍ରୀ ସାହୁଙ୍କ ସହିତ ସେମାନଙ୍କ ଦୀର୍ଘ କାର୍ଯ୍ୟକାଳର ଅନୁଭୂତି ଅତ୍ୟନ୍ତ ସ୍ମରଣୀୟ ବୋଲି ମତବ୍ୟକ୍ତ କରିଥିଲେ ।
ସଂଘର ସମ୍ପାଦକ ଲେପ୍ଟନାଣ୍ଟ କର୍ଣ୍ଣେଲ୍ ଅଧ୍ୟାପକ ଗୋବିନ୍ଦଚନ୍ଦ୍ର ବାଗ୍ ସମ୍ପାଦକୀୟ ବିବରଣୀ ପ୍ରଦାନ କରିଥିଲେ । ଅଧ୍ୟାପ ଡକ୍ଟର ପ୍ରଭାତ କୁମାର ମହାନ୍ତି ସ୍ୱାଗତ ଭାଷଣ ଓ ଅଧ୍ୟାପକ ମୃତୁ୍ୟଞ୍ଜୟ ନାରାୟଣ ଦାସ ଅତିଥିମାନଙ୍କ ପରିଚୟ ପ୍ରଦାନ କରିଥିଲେ । ସମ୍ବର୍ଦ୍ଧନାର ଉତ୍ତରରେ ଶ୍ରୀ ସାହୁ ପ୍ରତ୍ୟେକ ନିଜନିଜ କର୍ତ୍ତବ୍ୟ ପ୍ରତି ଉତ୍ତରଦାୟିତା ରଖି ଅନୁଷ୍ଠାନକୁ ଆପଣାର କରିବାକୁ ପରାମର୍ଶ ଦେଇଥିଲେ । ଅଧ୍ୟାପକ ବିଶ୍ୱରଞ୍ଜନ ଦାସ ସମ୍ବର୍ଦ୍ଧନାପତ୍ର ପାଠ କରିଥିଲେ । ନିକଟରେ ପରଲୋକ ଗମନ କରିଥିବା କଲେଜର ଚତୁର୍ଥଶ୍ରେଣୀ କର୍ମଚାରୀ ଦେବେନ୍ଦ୍ର କୁମାର ନାୟକଙ୍କ ଉଦେ୍ଦଶ୍ୟରେ ୧ ମିନିଟ୍ ନୀରବ ପ୍ରାର୍ଥନା କରାଯାଇଥିଲା । ଏହି ଅବସରରେ ଓଡ଼ିଆ ଭାଷା ଓ ସାହିତ୍ୟ ବିଭାଗରେ ନୂତନ ଭାବେ ଯୋଗଦାନ କରିଥିବା ଅଧ୍ୟାପିକା ରଜନୀଗନ୍ଧା ପତିଙ୍କୁ ସଂଘ ପକ୍ଷରୁ ସ୍ୱାଗତ ସମ୍ବର୍ଦ୍ଧନା ପ୍ରଦାନ କରାଯାଇଥିଲା । ସହ ସମ୍ପାଦକ ବୈଷ୍ଣବ ଚରଣ ମହାନ୍ତି ଧନ୍ୟବାଦ ଅର୍ପଣ କରିଥିଲେ ।
