ନିମାପଡା : ନିମାପଡା ଆଥଲେଟିକ ଆସୋସିଏସନ ପକ୍ଷରୁ ଆସନ୍ତା ଜାନୁୟାରୀ ୫ ତାରିଖରୁ ସ୍ଥାନୀୟ ବାରବାଟୀ ଷ୍ଟାଡିୟମରେ ୨୯ତମ ନିମାପଡ଼ା କପ କ୍ରିକେଟ ଟୁର୍ଣ୍ଣାମେଣ୍ଟ ଆୟୋଜିତ ହେବ।ଏଥିପାଇଁ ପ୍ରଥମ ପ୍ରସ୍ତୁତି ବୈଠକ ଅନୁଷ୍ଠିତ ହୋଇଯାଇଛି। ଏହି ଟୁର୍ଣ୍ଣ।ମେଣ୍ଟ ଆସନ୍ତା ଜାନୁଆରୀ ୫ରୁ ଆରମ୍ଭ ହୋଇ ୧୨ତାରିଖ ପର୍ଯ୍ୟନ୍ତ ଚାଲିବ। ଏହି ରାଜ୍ୟସ୍ତରୀୟ କ୍ରିକେଟ ଟୁର୍ଣ୍ଣାମେଣ୍ଟରେ ଓଡିଶାର ବିଭିନ୍ନ ଜିଲ୍ଲା ପୁରୀ, କଟକ, ଭୁବନେଶ୍ୱର, ପାରାଦ୍ୱୀପ, ରାଉରକେଲା, ବ୍ରହ୍ମପୁର ଓ ରେଲୱେ ପ୍ରମୁଖ ୮ଟି ଟିମ୍ ଅଂଶଗ୍ରହଣ କରିବା ନିମନ୍ତେ ସମ୍ମତି ପ୍ରକାଶ କରିଥିବା ଜଣାପଡିଛି। ନିମାପଡ଼ା ଆଥଲେଟିକ ଆସୋସିଏସନ କ୍ରିକେଟ ସଂପାଦକ ଅକ୍ଷୟ ବେହେରାଙ୍କ ପୌରାହିତ୍ୟରେ ଆସୋସିଏସନ ପରିସରରେ କୋର୍ କମିଟି ବୈଠକ ଅନୁଷ୍ଠିତ ହୋଇଥିଲା।ଏଥିରେ ଅଭିନନ୍ଦନ ପାତ୍ର, ସରୋଜ ମହାନ୍ତି, ଅଭିଜିତ ମିଶ୍ର, ଆଶୁତୋଷ ରାୟ,ଡି.ଏସ୍.ମହାନ୍ତି, ଅଶୋକ ସାହୁ,ବିଶିଷ୍ଟ ସୁନା ବ୍ୟବସାୟୀ ପୂର୍ଣ୍ଣଚନ୍ଦ୍ର ସାହୁ ପ୍ରମୁଖ ବରିଷ୍ଠ ସଭ୍ୟମାନେ ଯୋଗଦେଇ ୨୯ତମ ଟୁର୍ଣ୍ଣାମେଣ୍ଟକୁ ପୂର୍ବ ବର୍ଷ ଅପେକ୍ଷା ଅଧିକ ସରସ ସୁନ୍ଦର କରିବା ନିମନ୍ତେ ଆଲୋଚନା କରିଥିଲେ। ଦୀର୍ଘ ୨୮ବର୍ଷ ଧରି ଆୟୋଜିତ ହୋଇ ଆସୁଥିବା ଏହି ଟୁର୍ଣ୍ଣାମେଣ୍ଟ ନିମାପଡ଼ାର କ୍ରିକେଟ ଖେଳ ଓ ଖେଳାଳିଙ୍କୁ ରାଜ୍ୟ ତଥା ରାଜ୍ୟ ବାହାରେ ଏକ ସ୍ୱତନ୍ତ୍ର ପରିଚୟ ସୃଷ୍ଟି କରିଥିବା ବେଳେ ଚଳିତ ସଂସ୍କରଣ ଅଧିକ ଆକର୍ଷଣୀୟ ତଥା ଧୂମଧାମ୍ ସହକାରେ ଆୟୋଜନ କରାଯିବ ବୋଲି ଆସୋସିଏସନର କ୍ରିକେଟ ସଂପାଦକ ଅକ୍ଷୟ ବେହେରା ସୂଚନା ଦେଇଛନ୍ତି ।
