ଫୁଲବାଣୀ : ଆଜି ଫୁଲବାଣୀ ମାଦିକୁନ୍ଦା ପୋଲିସ ବ୍ୟାରେକଠାରେ ଏକ ଅଭାବନୀୟ ଘଟଣା ଘଟିଛି । ୨୯.୦୩.୨୦୧୯ ତାରିଖରେ ପୋଲିସ ନିକଟରେ ଆତ୍ମସମର୍ପଣ କରିଥିବା ଜଣେ ପୂର୍ବତନ ମହିଳା ମାଓବାଦୀ ନିଜ ବେକରେ ଲୁଗା ଲଗାଇ ଆତ୍ମହତ୍ୟା କରିଛି । ଏହି ସୁଚନା ଆଜି କନ୍ଧମାଳ ଆରକ୍ଷୀଧିକ୍ଷକ ପ୍ରତୀକ ଗୀତା ସିଂ ପ୍ରଦାନ କରିଛନ୍ତି ।
ସୁଚନା ଅନୁସାରେ କନ୍ଧମାଳ ଜିଲା ଫିରିଙ୍ଗିଆ ଅଂଚଳର ଜାର୍ଗିସରୁ ଗ୍ରାମର ମହିଳା କ୍ୟାଡର ସଦସ୍ୟା ସିଜୁ କହଁର(୨୨) କନ୍ଧମାଳ ପୋଲିସ ନିକଟରେ ଆତ୍ମସମର୍ପଣ କରିଥିଲା । ତାର ସୁରକ୍ଷା ଦୃଷ୍ଟିରୁ ପୋଲିସ ତାକୁ ଫୁଲବାଣୀ ପୋଲିସ ବ୍ୟାରେକରେ ଥିବା ଏକ ଅଲଗା ଘରେ ତାକୁ ଅସ୍ଥାୟୀ ଭାବରେ ରଖିଥିଲା ତାର ସମସ୍ତ ପ୍ରାପ୍ୟ ମଧ୍ୟ ପ୍ରଦାନ କରିବାସହିତ ତାର ପୁନଃଥଇଥାନ ପାଇଁ ବ୍ୟବସ୍ଥା କରିଥିଲା । ତେବେ ଆଜି ସକାଳ ୯ଟାବେଳେ ପୋଲିସ ତାର ଝୁଲନ୍ତା ମୃତଦେହ ସେ ରହୁଥିବା ଘରୁ ଉଦ୍ଧାର କରିଥିବା ଆରକ୍ଷୀ ଅଧିକ୍ଷକ ସୁଚନା ଦେଇଛନ୍ତି ।
ଏହି ସଂକ୍ରାନ୍ତରେ ଫୁଲବାଣୀ ଟାଉନ ଥାନାରେ ଏକ ଅପମୃତୁ୍ୟ ମାମଲା ୨୧/୨୦ ରୁଜ୍ଜୁ କରି ପୋଲିସ ଘଟନାର ତଦନ୍ତ ଜାରି ରହିଥିବା ନେଇ ପୋଲିସ ପକ୍ଷରୁ ଜଣାପଡିଛି । ମୃତ ସିଜୁ କହଁର ୨୦୧୬ ମସିହାରେ କେକେବିଏନ ମାଓ ସଂଗଠନରେ ଜଣେ ମାଓକ୍ୟାଡର ଭାବରେ ଯୋଗ ଦେଇଥିଲା । ଏହି ସମୟ ଭିତରେ ସେ ମାଓ ସଂଗଠନର ବିଭିନ୍ନ ମାମଲାରେ ମଧ୍ୟ ଜଡିତ ଥିବା ପୋଲିସ ନିକଟରେ କହିବାସହିତ ମାଓବାଦୀ ସଂଗଠନର ସମାଜ ବିରୋଧି କାର୍ଯ୍ୟକଳାପରେ ଅତିଷ୍ଠ ହୋଇ ସଂଗଠନ ଛାଡି ଆତ୍ମସମର୍ପଣ କରିଥିବା କହିଥିଲା । ତେବେ ତାର ମୃତୁ୍ୟର କାରଣ ତଦନ୍ତ ପରେ ହିଁ ଜଣାପଡିବ ବୋଲି ପୋଲିସ ସୁତ୍ରରୁ ଜଣାପଡିଛି ।
