ଡେରାବିଶ : ଆଜି ପବିତ୍ର ଗଣେଶ ଚତୁର୍ଥୀ ଉପଲକ୍ଷେ ସ୍ଥାନୀୟ ଅଂଚଳରେ ବିଘ୍ନନାଶକ ଗଜାନନଙ୍କ ପୂଜା ଉତ୍ସବ ନିରାଡ଼ମ୍ବର ଭାବେ ଅନୁଷ୍ଠିତ ହୋଇଯାଇଛି । ବିଶେଷ କରି ଅଂଚଳର ସମସ୍ତ ଶିକ୍ଷାନୁଷ୍ଠାନ, ଅଧିକାଂଶ ବ୍ୟବସାୟ ପ୍ରତିଷ୍ଠାନ ଏବଂ ମଧୁବୈଶ୍ୟ ସମ୍ପ୍ରଦାୟ ଏହା ଏକ ପ୍ରମୁଖ ପର୍ବ ହୋଇଥିବାରୁ ମହାଆଡ଼ମ୍ବରରେ ଗଣେଶପୂଜା ସାଧାରଣତଃ ପାଳିତ ହୋଇଥାଏ । ଏହାଛଡ଼ା ହିନ୍ଦୁଧର୍ମରେ ବିଭିନ୍ନ ପୂଜା ପାର୍ବଣ ଋତୁର ଆରମ୍ଭ ଗଣେଶଙ୍କ ପୂଜା ଠାରୁ ହୋଇଥାଏ ।
ତେଣୁ ଏହି ପର୍ବକୁ ନେଇ ମୂର୍ତିକାରିଗର, ଡେକୋରେସନ୍ ସଂସ୍ଥା, ଭୋଗପ୍ରସ୍ତୁତକାରୀ ଦୋକାନ, ଫଳଦୋକାନ, ବାଦ୍ୟ ଓ ସଙ୍ଗୀତ ଶିଳ୍ପୀମାନଙ୍କର ରୋଜଗାରର ପ୍ରଥମ ଶୁଭାରମ୍ଭ ହୋଇଥାଏ । ହେଲେ କରୋନାର ସରକାରୀ କଟକଣା ଯୋଗୁ ପ୍ରଥମ ପର୍ବ ଗଣେଶଙ୍କ ପୂଜା ଖୁବ୍ ନିରାଡ଼ାମ୍ବର ଭାବରେ ଏବଂ ନିଜ ଘର ମାନଙ୍କରେ ପାଳିତ ହୋଇଯାଇଛି । ଏପରିକି ବିଦ୍ୟାଳୟରେ ଛାତ୍ରଛାତ୍ରୀଙ୍କ ବିନା, ବ୍ୟବସାୟ ପ୍ରତିଷ୍ଠାନରେ ଗ୍ରାହକଙ୍କ ବିନା ଏହି ପର୍ବ ସମାହିତ ହୋଇଛି ।
