ସମସ୍ୟାର ସମାଧାନ ନ ଖୋଜି ନିଜ ରାଜନୈତିକ ଗୋଟି ଚଳାଉଛନ୍ତି ବିରୋଧୀ : ଇଏସ୍ଏମ୍ ପ୍ରକୋଷ୍ଠ

 ମୁଖ୍ୟମନ୍ତ୍ରୀଙ୍କୁ କୃତଜ୍ଞତା ଜ୍ଞାପନ କଲେ ବିଜେପିର ପୂର୍ବ ସୈନିକ ପ୍ରକୋଷ୍ଠର ସଦସ୍ୟ
 ରାଜ୍ୟ ସରକାର ପରିପକ୍ୱତା ଓ ସୁଶାସନର ପରିଚୟ ଦେଇ ମାମଲାର ସମାଧାନ ପାଇଁ ବିହୀତ ପଦକ୍ଷେପ ନେଇଛନ୍ତି
 ପୀଡ଼ିତାଙ୍କ ସହ ଆଲୋଚନା ପାଇଁ ୨ ଉପମୁଖ୍ୟମନ୍ତ୍ରୀ, ଆଇନମନ୍ତ୍ରୀ, ରାଜସ୍ୱ ମନ୍ତ୍ରୀଙ୍କୁ ନେଇ କମିଟି ଗଠନ କରାଯାଇଛି
ଭୁବନେଶ୍ୱର, ତା.୨୩/୦୯: ଭରତପୁର ପୋଲିସ ଷ୍ଟେସନ ଘଟଣା ଏବେ ସାରା ଦେଶରେ ଆଲୋଡନ ସୃଷ୍ଟି କରିବା ସହ ଗଣମାଧ୍ୟମରେ ଚର୍ଚ୍ଚାର ବିଷୟ ପାଲଟିଛି । ଏହି ବିଷୟରେ ପ୍ରତ୍ୟେକ ବ୍ୟକ୍ତି, ସଙ୍ଗଠନ ନିଜସ୍ୱ ମତ ରଖୁଥିବାବେଳେ ପ୍ରକୃତ ସତ୍ୟଠାରୁ ବହୁ ଦୂରରେ ରହିଛନ୍ତି । ଏହି ସମସ୍ୟାର ସମାଧାନ ପାଇଁ ବିରୋଧୀ ଦଳ ଗୁଡିକ କୌଣସି ଗଠନମୂଳକ ପରାମର୍ଶ ଦେବା ପରିବର୍ତେ ରାଜନୀତି କରିବାକୁ ଉଦ୍ୟମ କରୁଛନ୍ତି । ସେମାନେ ସମସ୍ୟାର ସମାଧାନ ନ ଖୋଜି ନିଜ ରାଜନୈତିକ ଗୋଟି ଚଳାଇବା ପାଇଁ ସରକାରଙ୍କ କାର୍ଯ୍ୟଶୈଳୀ ଉପରେ ପ୍ରଶ୍ନ ଉଠାଇ ଅଯଥାରେ ଧର୍ମଘଟ ଓ ଆନେ୍ଦାଳନ କରୁଛନ୍ତି । ଏହାଦ୍ୱାରା ସାଧାରଣ ଜନତା ବହୁ ଅସୁବିଧାର ସମ୍ମୁଖୀନ ହେଉଛନ୍ତି । ଅପରପକ୍ଷେ ଏହି ସଙ୍କଟ ସମୟରେ ନିଜର ପରିପକ୍ୱତା ଓ ସୁଶାସନର ପରିଚୟ ଦେଇ ମାମଲାର ସମାଧାନ ପାଇଁ ସରକାର ବିହୀତ ପଦକ୍ଷେପ ନେଇଛନ୍ତି । ଏନେଇ ରାଜ୍ୟ ବିଜେପି ଇଏସ୍ଏମ୍ (ରାଜ୍ୟ ପୂର୍ବ ସୈନିକ ପକୋଷ୍ଠ) ତରଫରୁ ମାନ୍ୟବର ମୁଖମନ୍ତ୍ରୀ ଶ୍ରୀ ମୋହନ ଚରଣ ମାଝିଙ୍କ ନେତୃତ୍ୱ ବିଜେପି ସରକାରଙ୍କୁ ପ୍ରଶଂସା କରିଛନ୍ତି ।
ଗତକାଲି ଭୁବନେଶ୍ୱରଠାରେ ଏହି ପ୍ରସଙ୍ଗକୁ ନେଇ ଏକ ବୈଠକ ଅନୁଷ୍ଠିତ ହୋଇଯାଇଛି । ବୈଠକରେ ଇଏସ୍ଏମ୍ ପ୍ରକୋଷ୍ଠର ସଦସ୍ୟମାନେ ଉପସ୍ଥିତ ରହି ଘଟଣାର ସମାଧାନ ପାଇଁ ମୁଖ୍ୟମନ୍ତ୍ରୀଙ୍କୁ ଅନୁରୋଧ କରିଥିଲେ । ଏହାପରେ ମୁଖ୍ୟମନ୍ତ୍ରୀଙ୍କ ନିଦେ୍ର୍ଦଶକ୍ରମେ ଏକ ମନ୍ତ୍ରୀସ୍ତରୀୟ କମିଟି ଗଠନ କରାଯାଇଥିଲା । ଏହି କମିଟିରେ ଉପମୁଖ୍ୟମନ୍ତ୍ରୀ ଶ୍ରୀମତି ପ୍ରଭାତି ପରିଡ଼ା, ଶ୍ରୀ କନକ ବର୍ଦ୍ଧନ ସିଂଦେଓ, ଆଇନମନ୍ତ୍ରୀ ଶ୍ରୀ ପୃଥ୍ୱୀରାଜ ହରିଚନ୍ଦନ ଓ ରାଜସ୍ୱ ମନ୍ତ୍ରୀ ଶ୍ରୀ ସୁରେଶ ପୂଜାରୀ ସଦସ୍ୟ ରହିଛନ୍ତି । ଏହି କମିଟି ଇଏସ୍ଏମ୍ ପ୍ରକୋଷ୍ଠର ବରିଷ୍ଠ ସଦସ୍ୟମାନଙ୍କ ସହ ଆଲୋଚନା କରି ଏକ ନିରପେକ୍ଷ, ସମୟୋଚିତ ନ୍ୟାୟିକ ଯାଂଚ ପାଇଁ ନିଦେ୍ର୍ଦଶ ଦେଇଛନ୍ତି । ଏଥିପାଇଁ ଇଏସ୍ଏମ୍ ପ୍ରକୋଷ୍ଠର ସଦସ୍ୟମାନେ ମୁଖ୍ୟମନ୍ତ୍ରୀ ମାଝିଙ୍କୁ କୃତଜ୍ଞତା ଜଣାଇଛନ୍ତି ।
ଏହି ଅବସରରେ ଇଏସ୍ଏମ୍ ପ୍ରକୋଷ୍ଠର ସହ-ସଂଯୋଜକ କର୍ଣ୍ଣେଲ ମୋହନ ପ୍ରସାଦ ନନ୍ଦ, କର୍ଣ୍ଣେଲ ପି.କେ ପ୍ରଧାନ, ମାନସ ଶତପଥୀ ଓ ଅନ୍ୟ ବରିଷ୍ଠ ପୂର୍ବତନ ସେନାଧିôକାରୀମାନେ ଉପସ୍ଥିତ ଥିଲେ ।