ବେତନଟୀ : ବୈଶିଙ୍ଗା ଥାନା ଅଧୀନ ପାଟୁଳିପୁରା ପଞ୍ଚାୟତ ଡେମ୍ଫୋଦା ଗ୍ରାମରେ ଘଟିଛି ଏକ ବିଭତ୍ସ ହତ୍ୟାକାଣ୍ଡ । ପରିବା ବିକ୍ରି କରି ଚଳୁଥିବା ଉକ୍ତ ଗ୍ରାମର ୫୩ ବର୍ଷୀୟ ବୃଦ୍ଧ ଦେବେନ୍ଦ୍ର ସାସମଲଙ୍କୁ ରାତ୍ରୀ ସମୟରେ ତାଙ୍କ ଘର ବାରଣ୍ଡାରେ ଶୋଇଥିବା ଅବସ୍ଥାରେ କେହି ଜଣେ ତାଙ୍କୁ ହାଣି ହତ୍ୟା କରିଥିବାର ସନ୍ଦେହ କରୁଛନ୍ତି ପରିବାର ଲୋକେ l ଯାହାକି ବୈଶିଙ୍ଗା ଅଞ୍ଚଳରେ ଚାଞ୍ଚଲ୍ୟ ଖେଳାଇ ଦେଇଛି । ମିଳିଥିବା ସୂଚନା ଅନୁସାରେ ମୃତ ଦେବେନ୍ଦ୍ର ୨ ପୁଅ ଓ ସ୍ତ୍ରୀ ଙ୍କ ସହିତ ରାତ୍ରୀ ଭୋଜନ ସାରି ସବୁଦିନ ପରି ଘର ବାରଣ୍ଡାରେ ଏକୁଟିଆ ଶୋଇଥିଲେ। ତାଙ୍କ ଦୁଇ ପୁଅ ଓ ସ୍ତ୍ରୀ ଘର ଭିତରେ କବାଟ ମାରି ଘର ଭିତରେ ଶୋଇଥିଲେ l ମୃତକଙ୍କ ପୁଅ ରତ୍ନାକରଙ୍କ କହିବା ମୁତାବକ ସେ ରାତି ପ୍ରାୟ ୨ଟା ସମୟରେ ହଠାତ ଗୋଟିଏ ଜୋରରେ ଶବ୍ଦ ହେବା ପରେ କବାଟ ଖୋଲି ଘର ବାହାରକୁ ଆସିଥିଲେ ଓ ବାପାଙ୍କୁ ରକ୍ତ ଜୁଡୁବୁଡୁ ଅବସ୍ଥାରେ ମୃତ୍ୟୁ ହୋଇଯାଇଥିବାର ଦେଖିବାକୁ ପାଇଥିଲେ । ଘରର ବାରଣ୍ଡା ରକ୍ତରେ ଲାଲ ହୋଇ ଯାଇଥିବା ବେଳେ ବେକ ପାଖରେ ଧାରୁଆ ଅସ୍ତ୍ରରେ ଆକ୍ରମଣ କରାଯାଇଥିବା ଦେଖିବାକୁ ପାଇଥିଲେ। ଭୟରେ ସେ ତୁରନ୍ତ ତାଙ୍କ ଭାଇ ଓ ମାଆଙ୍କୁ ଡାକି ଉଠାଇଥିଲେ ଏବଂ ପଡୋଶୀ ଲୋକଙ୍କୁ ମଧ୍ୟ ଖବର ମଧ୍ୟ ଦେଇଥିଲେ l ଖବର ପାଇ ବୈଶିଙ୍ଗା ଥାନାଧିକାରୀ ତପନ କୁମାର ପ୍ରଧାନ , ଏସଡିପିଓ ସୁଦର୍ଶନ ଦାଶ ସଦଳବଳ ଘଟଣାସ୍ଥଳରେ ପହଞ୍ଚି ଥିବା ବେଳେ ପରବର୍ତ୍ତୀ ସମୟରେ ସାଇଣ୍ଟିଫିକ ଟିମ ପହଁଚି ତଦନ୍ତ କରିଥିଲେ । ଏ ନେଇ ଥାନାରେ ଏକ ମାମଲା ରୁଜ୍ଜୁ କରିବା ସହ
ଶବକୁ ଜବତ କରି ବ୍ୟବଚ୍ଛେଦ ପାଇଁ ପଠାଇଥିବା ବେଳେ ସ୍ଥାନୀୟ ବୈଶିଙ୍ଗା ଅଞ୍ଚଳରେ ଏହି ଘଟଣା ଚାଞ୍ଚଲ୍ୟ ସୃଷ୍ଟି କରିଛି l ମୃତକ ଜଣକ ପରିବା ବିକ୍ରୀ କରି ପରିବାର ପୋଷଣ କରୁଥିଲେ। ପୁଲିସ ମୃତକଙ୍କ ଦୁଇ ପୁଅ ଏବଂ ସ୍ତ୍ରୀକୁ ପଚରାଉଚରା ଜାରିରଖିଥିବା ବେଳେ ଏବେ ବି ମୃତ୍ୟୁ ର କାରଣ ଅସ୍ପଷ୍ଟ ଥିବା ଜଣା ଯାଇଛି ।
