ତିହିଡି,୧୯/୧୧(ଯଦୁମଣି ପାଣିଗ୍ରାହୀ): ତିହିଡି ଥାନା ଇଲାକାରୁ ଅପହରଣ ହୋଇଥିବା ୨ ନାବାଳିକାଙ୍କୁ ତିହିଡି ପୋଲିସ ଉଦ୍ଧାର କରିବା ସହିତ ଅପହର୍ତ୍ତା ୨ ଜଣ ଯୁବକଙ୍କୁ ଗିରଫ କରିଛି । ଏଥିନେଇ ଭଦ୍ରକ ଏସପିଙ୍କ ନିଦେ୍ର୍ଦଶକ୍ରମେ ତିହିଡି ଥାନାଧିକାରୀ ଏଭଳି ପଦକ୍ଷେପ ଗ୍ରହଣ କରିଥିବା ଜଣାଯାଇଛି । ପ୍ରକାଶ ଯେ, ଏହି ଥାନା ଅନ୍ତର୍ଗତ ବାରୋ ପଞ୍ଚାୟତର ବାରୋ ଗ୍ରାମର ୮ମ ଶ୍ରେଣୀରେ ପଢୁଥିବା ଜଣେ ନାବାଳିକାଙ୍କୁ ସ୍ଥାନୀୟ ପାଟଣାସାହି ଗ୍ରାମର ଶଶିକାନ୍ତ ମହାଳିକ ବିବାହର ପ୍ରଲୋଭନ ଦେଖାଇ ଗତ ଅକ୍ଟୋବର ୩୧ତାରିଖ ଦିନ ତିହିଡି କାଳୀପଡିଆ ନିକଟରୁ ଅପହରଣ କରିନେଇଥିଲେ । ଏଥିନେଇ ପୋଲିସ ଏକ ମାମଲା ନଂ-୪୯୩/୨୪ ରୁଜୁ କରିବା ସହିତ ଘଟଣାର ତଦନ୍ତ କରୁଥିଲା । ତେବେ କୌଣସି ସୂତ୍ରରୁ ଖବର ପାଇ ଗତ ୧୭ ତାରିଖ ଦିନ ତିହିଡି ପୋଲିସ ବାଲେଶ୍ୱର ରେଳ ଷ୍ଟେସନରୁ ସଂପୃକ୍ତା ନାବାଳିକାକୁ ଉଦ୍ଧାର କରିବା ସହିତ ଅଭିଯୁକ୍ତ ଶଶିକାନ୍ତକୁ ଗିରଫ କରିଛି । ସେହିପରି ଏହି ଅପହରଣ ଘଟଣାରେ ଶଶିକାନ୍ତ ବ୍ୟବହାର କରିଥିବା ନିଜ ଗାଡି ନଂ(ଓଡି୨୨ଡବ୍ଲୁ୍ୟ-୯୮୩୩)କୁ ବି ପୋଲିସ ଜବତ କରିଛି । ଅନ୍ୟପକ୍ଷେ ବାରୋ ଗ୍ରାମର ପ୍ରୀତମ ବାରିକ ନାମକ ଜଣେ ଯୁବକ ଗତ ଏପ୍ରିଲ ମାସରେ ଜଣେ ନାବାଳିକାକୁ ଅପହରଣ କରି ଗୁଜୁରାଟ ନେଇ ଯାଇଥିବା ଥାନାରେ ଅଭିଯୋଗ ହୋଇଥିଲା । ଏଥିନେଇ ସେତେବେଳେ ଥାନାରେ ଏକ ମାମଲା ନଂ-୧୮୧/୨୪ ରୁଜୁ ହୋଇଥିଲା । ତେବେ ତିହିଡି ପୋଲିସର ଏକ ସ୍ୱତନ୍ତ୍ର ଟିମ ଗୁଜୁରାଟ ଯାଇ ଉକ୍ତ ନାବାଳିକାକୁ ଉଦ୍ଧାର କରିବା ସହିତ ସେଠାରୁ ପ୍ରୀତମକୁ ଗିରଫ କରି ତିହିଡି ଆଣିଥିଲେ । ଉଭୟ ଅପହର୍ତ୍ତା ଯୁବକଙ୍କୁ କୋର୍ଟ ଚାଲାଣ କରାଯାଇଛି ।
