ତିହିଡି, ୧୧/୧୧(ଯଦୁମଣି ପାଣିଗ୍ରାହୀ): ଗଣେଶ ମୂର୍ତ୍ତି ଭସାଣି ବେଳେ ତିହିଡି ଥାନାଧିନ ପାଳିଆ ହାଟରେ ହୋଇଥିବା ଗୋଷ୍ଠୀ ସଂଘର୍ଷର ମୁଖ୍ୟ ଅଭିଯୁକ୍ତ ଶ୍ରୀଧର ମଳିକ(୫୫)କୁ ଗିରଫ୍ କରିଛି ପୋଲିସ । ପୂର୍ବରୁ ଏହି ଘଟଣାରେ ୯ ଜଣ ଗିରଫ୍ ହୋଇଥିବା ବେଳେ ଶ୍ରୀଧର ହେଉଛି ୧୦ମ ଗିରଫ୍ ଅଭିଯୁକ୍ତ । ସୂଚନା ମୁତାବକ, ଗତ ୧୨.୦୯.୨୪ରିଖ ରାତି ପ୍ରାୟ ୮.୧୦ ଘଟିକାରେ ପାଳିଆ ବଜାରସ୍ଥିତ କୁଣ୍ଡି ନଈରେ ମୂର୍ତ୍ତି ବସର୍ଜନ କରି ଫେରୁଥିବା ବେଳେ ଜିଝାରପୁର ଗାଁର ଗଣେଶ ମଳିକଙ୍କ ପରିବାର ଓ ଆତ୍ମୀୟ ସ୍ୱଜନ ଏବଂ ପାଳିଆ ଗାଁର ସୟଦ୍ ସମସେଦ୍ ପରିବାର ମଧ୍ୟରେ ଗଣ୍ଡଗୋଳ ହୋଇଥିଲା । ଉଭୟ ପକ୍ଷରୁ ବହୁ ଲୋକ ଆହତ ହୋଇଥିବା ବେଳେ ୩ ଜଣ ଗୁରୁତର ମଧ୍ୟ ହୋଇଥିଲେ । ଗୋଷ୍ଠୀ ସଂଘର୍ଷ ଘଟଣାରେ ଜିଝାରପୁର ଗାଁର ଗଣେଶ ମଳିକଙ୍କ ସ୍ତ୍ରୀ କୌଶଲ୍ୟା ମଳିକଙ୍କ ଏତଲାକ୍ରମେ ଏକ ମାମଲା ୪୧୨/୨୪ ରୁଜୁ ହୋଇଥିବା ବେଳେ ସୟଦ୍ ସମସେଦଙ୍କ ପୁଅ ସୟଦ୍ ଆଲ୍ଲାଉଦ୍ଦିନଙ୍କ ଏତଲା କ୍ରମେ ଅନ୍ୟ ଏକ ମାମଲା ୪୧୩/୨୪ ରୁଜୁ ହୋଇଛି । ତେବେ ପୋଲିସ ଅନୁସନ୍ଧାନ କରିବା ପରେ ପାଳିଆ ଗାଁର କାଲିମୁଦ୍ଦିନ ସାହା, ସୟଦ୍ ସମସେଦ, ସୟଦ୍ ସରିଫ୍, ସୟଦ୍ ଆଲାମ ଓ ସୟଦ୍ ଫିରୋଜ୍ ଏବଂ ଜିଝାରପୁର ଗାଁର ରାଜୁ ମଳିକ, ଲକ୍ଷ୍ମୀଧର ମଳିକ, ନବକିଶୋର ମଳିକ ଓ ଦୀପକ ମଳିକ ପ୍ରମୁଖ ୯ ଜଣଙ୍କୁ ଗିରଫ୍ କରି ପରଦିନ କୋର୍ଟ ·ଲାଣ କରିଥିଲା । ତେବେ ମୁଖ୍ୟ ଅଭିଯୁକ୍ତ ଦୀର୍ଘଦିନ ଧରି ଫେରାର୍ ହୋଇଥିବା ବେଳେ ପୋଲିସ ଗିରଫ୍ କରି ସୋମବାର କୋର୍ଟ ·ଲାଣ କରିଥିବା ଆଇଆଇସି ପ୍ରସନ୍ନ କୁମାର ନାୟକ ସୂଚନା ଦେଇଛନ୍ତି ।
