ନୂଆପଡ଼ା – ୦୨/୧୧ (ସୁରେନ୍ଦ୍ର ତିୱାରୀ ) ନୂଆପଡ଼ା ଜିଲ୍ଲା ସିନାପାଲି ବ୍ଲକରେ ନୂତନ ଭାବରେ ଯୋଗଦାନ କରିଥିବା କନିଷ୍ଠ ଶିକ୍ଷକ ଶିକ୍ଷୟିତ୍ରୀଙ୍କୁ ବ୍ଲକ ଶିକ୍ଷା ବିଭାଗ ତରଫରୁ ଶନିବାର ସ୍ବାଗତ କରାଯାଇଛି । ଶିକ୍ଷାଧିକାରୀ ଯତୀନ୍ଦ୍ର କୁମାର ସେଠଙ୍କ ଅଧ୍ଯକ୍ଷତାର ଏନେଇ ସ୍ଥାନୀୟ ନିଲଜୀ ଉଚ୍ଚ ପ୍ରାଥମିକ ବିଦ୍ଯାଳୟ ଠାରେ ଅନୁଷ୍ଠିତ ସ୍ବାଗତ ସଭାରେ ମୁଖ୍ଯ ଅତିଥି ଭାବରେ ଏବିଇଓ ପ୍ରଦୀପ କୁମାର ପଣ୍ତା ଓ ସମ୍ମାନିତ ଅତିଥି ଭାବରେ ବିଭାଗୀୟ ସେକ୍ସନ୍ ଅଫିସର କମଳ ଚରଣ ମାଝୀ, ବରିଷ୍ଠ ଶିକ୍ଷକ ସତ୍ଯବ୍ରତ ଗହୀର, ବ୍ଲକ ପ୍ରାଥମିକ ଶିକ୍ଷକ ସଂଘ ସଭାପତି ପ୍ରସନ୍ନ କୁମାର ମାଝୀ ଯୋଗ ଦେଇଥିଲେ । ନିଜ ଦାୟିତ୍ୱ ଓ କର୍ତ୍ତବ୍ଯ ପ୍ରତି ନିଷ୍ଠା ଓ ସମର୍ପଣ ଭାବ ରଖି କାର୍ଯ୍ଯ କଲେ ଶିକ୍ଷକ ଜୀବନ ସଫଳ ହୋଇ ପାରିବ ବୋଲି ଏ ଅବସରରେ ବକ୍ତାମାନେ ମତ ପୋଷଣ କରିବା ସହ ମାର୍ଗଦର୍ଶନ କରିଥିଲେ । ପ୍ରାରମ୍ଭରେ ସିଆରସିସି ରାକେଶ ମିଶ୍ର ସମସ୍ତଙ୍କୁ ସ୍ବାଗତ କରିଥିବା ବେଳେ ସ୍ଥାନୀୟ ବିଦ୍ଯାଳୟର ଛାତ୍ରୀମାନେ ସ୍ବାଗତ ସଂଗୀତ ଗାନ କରିଥିଲେ । ବ୍ରାହ୍ମଣୀଗୁଡ଼ା କ୍ଲଷ୍ଟର ସିଆରସିସି ଖଗେଶ୍ୱର ନିଆଲ ସଭା କାର୍ଯ୍ଯ ପରିଚାଳନା କରିଥିଲେ । ଏହା ପରେ ନବନିଯୁକ୍ତ ଶିକ୍ଷକଶିକ୍ଷୟିତ୍ରୀ ନିଜନିଜ ପରିଚୟ ପ୍ରଦାନ କରିଥିବା ବେଳେ ସେମାନଙ୍କୁ ଶିକ୍ଷା ବିଭାଗ ତରଫରୁ ସ୍ୱାଗତ କରାଯାଇଥିଲା । ଦ୍ୱିତୀୟ ପର୍ଯ୍ଯାୟ ବୈଠକରେ ସିଆରସିସି ମହେଶ୍ୱର ଗୁଆଲ, କ୍ଷୀରସିନ୍ଧୁ ମେହେର ଓ ଖଗେଶ୍ୱର ନିଆଲ ଶିକ୍ଷକଙ୍କୁ ଶିକ୍ଷାବିଭାଗର ବିଭିନ୍ନ ନୀତିନିୟମ ବିଷୟରେ ଅବଗତ କରାଇଥିଲେ । କାର୍ଯ୍ଯକ୍ରମ ରେ ସିନାପାଲି ବ୍ଲକର ନବନିଯୁକ୍ତ ସମସ୍ତ ଶିକ୍ଷକଶିକ୍ଷୟିତ୍ରୀ ଉପସ୍ଥିତ ରହିଥିବା ବେଳେ ସ୍ଥାନୀୟ ବିଦ୍ଯାଳୟର ଶିକ୍ଷକ ଧୀରେନ୍ଦ୍ର କୁମାର ସା ଙ୍କ ସହ ସମସ୍ତ ସିଆରସିସି ସହଯୋଗ କରିଥିଲେ । ଶେଷରେ ବିଭାଗୀୟ ଏକାଉଣ୍ଟେଣ୍ଟ ସନ୍ତୋଷ ବନ୍ଦିଚ୍ଛୋର ଧନ୍ଯବାଦ ଅର୍ପଣ କରିଥିଲେ ।
